काठमाडौं — राष्ट्रिय स्वतन्त्र पार्टीको केन्द्रीय ऊर्जा तथा जलस्रोत विभागले ऊर्जा तथा जलस्रोत क्षेत्रका तीनजना वरिष्ठ विज्ञलाई सल्लाहकारमा मनोनयन गरेको छ।
आइतबार एक कार्यक्रममार्फत नेपाल सरकारका पूर्वसचिव ई. देवेन्द्र कार्की, ई. सुशील चन्द्र तिवारी र ई. मधु भेटुवाललाई औपचारिक रूपमा विभागीय विज्ञ सल्लाहकारमा नियुक्त गरिएको हो।
विभाग प्रमुख ई. श्रीराम न्यौपानेका अनुसार नेपालको समृद्धिको आधार ऊर्जा र जलस्रोत भएकाले त्यसको दीर्घकालीन र दिगो विकासका लागि अनुभवसंपन्न व्यक्तिहरूको ज्ञान सदुपयोग गर्न विज्ञ सल्लाहकारको टोली गठन गरिएको हो।
उनले भने ऊर्जा र जलस्रोतको अधिकतम उपयोगका लागि नीतिगत संरचना तयार गर्न विज्ञता आवश्यक छ। सचिवत्रयलाई विज्ञ सल्लाहकारमा मनोनयन गर्नुको कारण यही हो।
नवनियुक्त विज्ञ सल्लाहकारहरूले अघिल्लो कार्यकालमा नेपाल सरकारको ऊर्जा, जलस्रोत तथा सिँचाइ मन्त्रालय, भौतिक पूर्वाधार मन्त्रालय, जल तथा ऊर्जा आयोग लगायतका निकायहरूमा नेतृत्वदायी भूमिका निर्वाह गरिसकेका छन्।
विभाग प्रमुख न्यौपानेको सिफारिसमा पार्टीले यो निर्णय लिएको हो। पार्टीले विज्ञ सल्लाहकारहरूको सहयोगबाट दीर्घकालीन रणनीति, नीति निर्माण र कार्यान्वयनमा सघाउ हुने विश्वास लिएको छ।
