कैलाली — कैलालीको धनगढी विमानस्थलमा पार्किङ शुल्कको विषयमा विवाद हुँदा कुटाकुट भएको छ। विमानस्थल प्रहरीले दिएको जानकारीअनुसार पार्किङ शुल्कको विषयलाई लिएर उत्पन्न विवादले झगडाको रूप लिएको हो।
झगडाको भिडियो हाल सामाजिक सञ्जालमा सार्वजनिक भएको छ जसमा प्रहरीको बाक्लो उपस्थितिका बीच एक युवकमाथि तीन–चार जना युवाले कुटपिट गरिरहेको देखिन्छ। घटनास्थलमै रहेका सुरक्षाकर्मीले स्थिति नियन्त्रणमा लिने प्रयास गरे पनि भिडको व्यवहार आक्रामक देखिएको थियो।
यस विषयमा जिल्ला प्रहरी कार्यालय कैलालीका प्रहरी नायब उपरीक्षक (डीएसपी) राजकुमार सिंहले भने पार्किङ शुल्कको विषयमा सामान्य विवाद मात्रै भएको हो। स्थिति अहिले सामान्य छ।
भिडियो सामाजिक सञ्जालमा भाइरल भएसँगै सर्वसाधारणले विमानस्थलको सुरक्षाप्रणालीप्रति पनि प्रश्न उठाउन थालेका छन्। घटनाबारे थप अनुसन्धान भइरहेको प्रहरीले जनाएको छ।
