सुदूरपश्चिम प्रदेशका मुख्यमन्त्री कमलबहादुर शाह आज प्रदेश सभाबाट विश्वासको मत लिन लागेका छन्। नागरिक उन्मुक्ति पार्टीले सरकारबाट समर्थन फिर्ता लिएपछि उनले संविधानअनुसारको प्रक्रिया अन्तर्गत विश्वासको मत लिन लागेका हुन्।
विश्वासको मतका लागि आज बेलुकी ५ बजे प्रदेश सभा बैठक आह्वान गरिएको छ। बैठकमा नेपाली कांग्रेस र नेकपा एमालेले आफ्ना सांसदहरूलाई शाहको पक्षमा मतदान गर्न ह्विप जारी गरेका छन्।
यसअघि नागरिक उन्मुक्ति पार्टीले गत असार २० गते सरकारबाट समर्थन फिर्ता लिएको थियो। नेपालको संविधान अनुसार सरकारमा रहेका दलको समर्थन गुमाएपछि मुख्यमन्त्रीले ३० दिनभित्र विश्वासको मत लिनु पर्ने व्यवस्था छ। अबको प्रदेश सभाको निर्णयले शाहको नेतृत्वमा सरकार कायम रहने कि नयाँ सत्ता समीकरण बन्ने भन्ने निर्क्यौल हुनेछ।
