प्रधानमन्त्री सुशीला कार्कीले पद तथा गोपनीयताको सपथ लिएको १० दिन नाघिसक्दा पनि मन्त्रिपरिषद्लाई पूर्णता दिन सकेकी छैनन्। भदौ २७ गते सपथ लिएकी कार्कीले भदौ २९ गते ३ मन्त्री मात्र नियुक्त गरेकी थिइन्, तर त्यसयता मन्त्रिपरिषद् विस्तार हुन सकेको छैन।
जेनजी आन्दोलन (भदौ २३–२४) पछि अचानक प्रधानमन्त्री बन्ने अवसर पाएकी कार्कीले पछिल्लो समय समाजका प्रतिष्ठित व्यक्तिहरूसँग निरन्तर छलफल गर्दै मन्त्री पदको प्रस्ताव गरिरहेकी छिन्। उनले अघिल्लो साता तिलगंगा आँखा अस्पतालमै पुगेर डा. सन्दुक रुइतलाई मन्त्री पदको प्रस्ताव गरेकी थिइन् तर रुइतले अस्वीकार गरेका थिए। त्यस्तै संविधानविद् डा. भिमार्जुन आचार्यले पनि प्रस्ताव नस्वीकारेको जनाइएको छ।
यसैक्रममा कार्कीले नेपाली सेनाका पूर्व जर्नेल बालानन्द शर्मा, पाइलट विजय लामा, वैज्ञानिक महाविर पुनलगायतलाई समेत मन्त्री पदको अफर गरेकी छिन्। प्रस्ताव पाएकामध्ये महाविर पुनले सकारात्मक संकेत देखाएको बताइएको छ तर उनले अहिले नै खुलासा गर्न चाहेका छैनन्।
राजनीतिक व्यक्तित्वभन्दा बाहिरका विज्ञ र अहिलेसम्म विवादरहित व्यक्तिहरूलाई समेटेर बढीमा ११ सदस्यीय मन्त्रिपरिषद् बनाउने घोषणा गरेकी कार्कीले सोमबारसम्म मन्त्रिपरिषद् विस्तार गर्ने तयारी गरेको उनका निकट स्रोतले जनाएको छ।
