संखुवासभा — शुक्रबारदेखि आइतबारसम्म लगातार परेको अविरल वर्षाका कारण संखुवासभाका विभिन्न स्थानमा ठूलो क्षति पुगेको छ। पहिरोका कारण खाँदबारीस्थित जिल्ला कारागार, नेपाली सेनाको इन्द्रदल गुल्म, नगर अस्पताल र निजी घरहरू उच्च जोखिममा परेका छन्।
शनिबार दिउँसोको भीषण वर्षाले जिल्ला कारागार खाँदबारीको करिब ३० मिटर लामो बाहिरी पर्खाल भत्किएको जेलर राजन घिमिरेले जानकारी दिए। उनका अनुसार पहिरोले कारागारको तल्लो भागलाई समेत कमजोर बनाएको छ। रोकथामका लागि मर्मत कार्य सुरु गरिएको भए पनि वर्षा नरोकिएकाले समस्या झन् बढेको उनले बताए।
त्यस्तै सदरमुकाममै रहेको नेपाली सेनाको इन्द्रदल गुल्म पनि पहिरोको जोखिममा परेको छ।
चैनपुर नगरपालिका–६ स्थित १५ शय्याको नगर अस्पतालको पर्खाल भत्किएर जोखिममा परेको जिल्ला प्रहरी कार्यालय संखुवासभाका निमित्त प्रहरी प्रमुख प्रहरी निरीक्षक रामकुमार लामिछानेले जानकारी दिए। त्यस्तै, चैनपुर–३ सिद्धपोखरीका तेञ्जी शेर्पाको ढुङ्गामाटोको घर समेत पहिरोको उच्च जोखिममा परेको र परिवारलाई सुरक्षित स्थानमा सारिएको बताइएको छ।
यसैबीच सदरमुकाम खाँदबारीबाट भोटखोला गाउँपालिका जोड्ने उत्तर–दक्षिण सडकखण्ड एक महिनादेखि अवरुद्ध छ। मकालु गाउँपालिका–३ मा पहिरो खसेपछि सम्पर्क विच्छेद भएको हो।
निमित्त प्रहरी प्रमुख लामिछानेका अनुसार लगातारको वर्षाका कारण माथिल्लो क्षेत्रमा बाढीको जोखिम अझै बढिरहेको छ। अरुण नदीको पानी खतराको तह नाघेको र उत्तर–दक्षिण कोशी सडकका विभिन्न ठाउँमा पहिरोले अवरोध पुर्याएपछि जिल्ला बाहिर तथा ग्रामीण सडकहरूमा यातायात सञ्चालनमा रोक लगाइएको छ।
