समाचार
काठमाडौँ – जेन्जी मुभमेन्ट नेपालले आज दिउँसो २ बजे काठमाडौँको बल्खुमा विशाल सभा आयोजना गर्ने भएको छ। आयोजकका अनुसार सभामा हाल देशभर बढ्दै गएको युवा आन्दोलनका मुद्दा, सामाजिक–राजनीतिक परिवर्तनका एजेन्डा तथा नयाँ पुस्ताले अघि सारिरहेका सुधारका प्रस्तावहरूबारे खुला छलफल हुनेछ।
सभामा विभिन्न क्षेत्रका नागरिक, युवाहरू, सरोकारवाला समूह र सहभागीहरूलाई उपस्थित भई आफ्ना विचार, सुझाव र मागहरू स्पष्ट रूपमा राख्न आह्वान गरिएको छ। खुला संवाद, जनमत संकलन र उत्तरदायित्वको वातावरण निर्माण गर्नु नै सभाको मुख्य उद्देश्य हो, आयोजक टोलीले जनाएको छ।
नेता अजय सोडारीका अनुसार जेन्जी विद्रोहका क्रममा उठेका प्रमुख मुद्दाहरूलाई संविधान र नीतिगत संरचनामा संस्थागत गर्न दबाब सिर्जना गर्ने रणनीति सभाको केन्द्रमा रहनेछ। उनका अनुसार परिवर्तनका लागि उठेका आवाजलाई राज्य संरचनामा सुनिश्चित गराउन यो सभा महत्त्वपूर्ण मोड बन्न सक्छ।
जेन्जी मुभमेन्ट नेपालले आजको सभालाई देशव्यापी युवा असन्तुष्टि, परिवर्तनको चाहना र नागरिक उत्तरदायित्वको सामूहिक आवाजलाई एकैथलोमा सुन्ने तथा सुनाउने अवसरको रूपमा अर्थ्याएको छ।
