दार्चुलामा माटोको ढिस्कोले पुरिएर एक महिलाको मृत्यु भएको छ। बैतडीको डिलासैनी गाउँपालिका-३ सिमार घर भएकी २४ वर्षीया झुपा रानाको मृत्यु भएको हो।
राना बुधबार आफ्नो घरदेखि करिब एक किलोमिटर टाढा दार्चुलाको शैल्यशिखर नगरपालिका-१ चौडस्थित एक घरमा लिपपोतका लागि माटो खन्ने क्रममा माटोको ढिस्कोले पुरिएर गम्भीर घाइते भएकी थिइन्।
घटनापछि स्थानीयले उद्धार गरी उपचारका लागि गोकुलेश्वर अस्पताल, गोकुलेश्वर दार्चुला पुर्याएका थिए। तर अस्पताल पुर्याएपछि चिकित्सकले जाँच गर्दा उनलाई मृत घोषणा गरेको जिल्ला प्रहरी कार्यालय दार्चुलाले जनाएको छ।
