काठमाडौँ – प्रतिनिधिसभाकी उपसभामुख इन्दिरा रानाले आफूमाथि लागेका मानव बेचबिखनसम्बन्धी आरोपलाई पूर्णरूपमा खारेज गर्दै त्यसलाई राजनीतिक षड्यन्त्रको उपज भएको बताएकी छन् ।
न्युज एजेन्सी नेपालसँग कुरा गर्दै उनले संवैधानिक परिषद्मा नेपाली कांग्रेसको प्रतिनिधित्व नहुनु र आफू विपक्षी सदस्य भएकै कारण ठूला दलहरूले आफूलाई निशाना बनाएको जिकिर गरिन् । संवैधानिक परिषद्मा कांग्रेसको कुनै प्रतिनिधि छैन, म विपक्षी सदस्य भएकाले बहुमत सिद्ध गर्न मलाई हटाउन खोजिएको हो रानाले भनिन् ।
नेकपा एमालेका सांसद योगेश भट्टराईले लगाएको ‘मानव बेचबिखन’को आरोपलाई पनि उनले आधारहीन बताए । बेचिएको भनिएका बच्चाहरूले एक वर्षअघि नै मिडियामा आएर प्रष्ट पारिसकेका छन् । यो आरोप बिना अध्ययन लगाइएको हो, रानाले स्पष्ट पारिन् ।
उनका अनुसार आफ्नो संस्था ‘पीए नेपाल’ले जेलमा रहेका अभिभावकका बच्चाहरूलाई ट्रान्जिट संरक्षण र हेरचाह मात्र उपलब्ध गराएको हो । हामी गरीब परिवारका बच्चाहरूलाई शिक्षा र हेरचाह दिएका हौँ, बेचबिखन होइन उनले भनिन् ।
रानाले बच्चा र अभिभावकहरू नै मुख्य प्रमाण रहेको उल्लेख गर्दै उनीहरूको गोपनीयतामाथि राजनीति गर्नु गम्भीर अपराध भएको चेतावनी दिइन् । अभिभावकका ठेगाना हामीसँग छन्, सोध्न सकिन्छ । मैले संस्था छोडिसकेकी छु तर बच्चाहरूले ‘आमा’ भन्दा भेट्न पुग्छु । म सञ्चालक मात्र होइन, आमा बनेर हुर्काएकी हुँ उनले थपिन् ।
उपसभामुख रानाले काँग्रेस र एमाले मिलेर संवैधानिक परिषद्को नियुक्ति प्रक्रियामा अप्ठ्यारो भएकाले आफूलाई हटाउन खोजेको दाबी गरिन् । मेरो राजीनामा माग्ने कुनै आधार छैन । मैले त बालबेचबिखन रोक्नमै काम गरेकी हुँ उनले भनिन् ।
अमेरिकी दूतावाससम्बन्धी पत्रबारे उनले भनिन् एम्बेसीबाट सिफारिस मागिएको थियो, मैले पत्र तयार गरे पनि फारवार्ड गरेको छैन । यो रजिस्टर भएको छैन, अमेरिका पुगेको छैन ।
उनले तत्कालीन पार्टी महामन्त्री मुकुल ढकाललाई जानकारी गराएको र तत्कालीन गृहमन्त्री रवि लामिछानेकै समयमा छानबिन गर्दा कुनै आधार नदेखिएको पनि बताइन् ।
