काठमाडौं – संघीय संसद् सचिवालयका अधिकारीहरू पूर्वसभामुखहरूले लिइरहेका गाडी सुविधा फिर्ता गर्ने विषयमा छलफलमा जुटेका छन् । तर, यसबारे अझै कुनै निष्कर्षमा पुगेका छैनन् ।
अर्थ मन्त्रालयले हालै सेवानिवृत्त राजनीतिक तथा प्रशासनिक पदाधिकारीहरूले पाउँदै आएका गाडी, जिन्सी सामान, सहयोगी र सुरक्षाकर्मीसमेत फिर्ता गर्न निर्देशन दिँदै गृह मन्त्रालय र रक्षा मन्त्रालयलाई पत्राचार गरेको हो । यही असोज ५ गते बसेको मन्त्रिपरिषद् बैठकले अनुत्पादक खर्च कटौती गर्ने निर्णय गरेपछि अर्थ मन्त्रालयले यस्तो कदम चालेको हो ।
संसद सचिवालयका प्रवक्ता एकराम गिरीका अनुसार पूर्वसभामुखलाई मन्त्रिपरिषद्को निर्णयका आधारमा गाडी सुविधा उपलब्ध गराइएको भए पनि अर्थ मन्त्रालयको निर्णयले सो सुविधा काट्न सक्ने/नसक्ने भन्ने प्रश्न उठेको छ । उनले राष्ट्रिय सभाका अध्यक्षको हकमा भने यस्तै सुविधा दिने निर्णय भएको जानकारी सचिवालयमा नरहेको स्पष्ट पारे ।
पूर्वसभामुखहरू ओनसरी घर्ती, कृष्णबहादुर महरा र अग्नि सापकोटाले गाडी सुविधा लिइरहेका छन् । रामचन्द्र पौडेलले भने राष्ट्रपति बनेपछि पूर्वसभामुखको हैसियतमा लिएको गाडी फिर्ता गरेका थिए ।
यसैगरी नियम अनुसार नपाउने सुविधा बहालवाला पदाधिकारी र उनीहरूको सचिवालयमा कार्यरत सदस्यहरूले पनि प्रयोग गरिरहेको विषयमा छलफल भइरहेको संसद् स्रोतले जनाएको छ ।
