बागलुङको ताराखोला गाउँपालिका–१ गाईघाट झरना नजिकै जीप दुर्घटना हुँदा एकजनाको मृत्यु भएको छ भने दुईजना घाइते भएका छन्।
ताराखोलाबाट गलकोट नगरपालिका–५ सर्दाखेततर्फ जाँदै गरेको ग १ ज ६१०० नम्बरको जीप गाईघाट नजिकै करिब २० मिटर तल खोलामा खस्दा सर्दाखेतका २६ वर्षीय दिनेश थापाको घटनास्थलमै मृत्यु भएको इलाका प्रहरी कार्यालय हरिचौरले जनाएको छ।
दुर्घटनामा परि सोही स्थानका २४ वर्षीय मिलन परियार र ४३ वर्षीय बिरवल परियार घाइते भएका छन्। गम्भीर घाइते बिरवल परियारलाई थप उपचारका लागि पोखरा मणिपाल अस्पताल पठाइएको छ भने मिलन परियारको गलकोट नगर अस्पतालमा उपचार भइरहेको छ।
प्रहरीका अनुसार दुर्घटनाको कारणबारे अनुसन्धान भइरहेको छ।
