ट्वान्टी–२० विश्वकप एसिया–इस्ट एसिया प्यासिफिक छनोटमा नेपालले जापानलाई ५ विकेटले पराजित गर्दै समूह ‘बी’ को विजेता बनेर सुपर सिक्समा प्रवेश गरेको छ ।
जापानले दिएको १ सय ३२ रनको लक्ष्य नेपालले १८ ओभरमै पूरा गर्यो । यसअघि समूह ‘बी’ को पहिलो खेलमा नेपालले कुवेतलाई ५८ रनले हराएको थियो भने जापानले पनि कुवेतलाई ५ विकेटले हराउँदै दोस्रो चरणमा पुगेको थियो । कुवेत भने समूह चरणमै बाहिरिएको छ ।
समूह विजेता बनेको नेपालसँग सुपर सिक्स चरणमा अतिरिक्त २ अंक हुनेछ । नेपालले अब आइतबार समूह ‘ए’ को विजेतासँग र सोमबार कतारसँग खेल्नेछ । त्यसपछि समूह ‘सी’ को विजेता र उपविजेतासँग दुई खेल खेल्ने तालिका छ । सुपर सिक्सका शीर्ष तीन टोली फेब्रुअरी–मार्चमा भारतमा हुने ट्वान्टी–२० विश्वकपमा छनोट हुनेछन् ।
नेपालका लागि कुशल भुर्तेल र आसिफ शेखले राम्रो सुरुआत दिलाए । भुर्तेल २१ रनमा आउट भए भने आसिफले २१ बलमा १ चौका र ४ छक्कासहित ३८ रन बनाए । कप्तान रोहित पौडेलले १८, गुलशन झाले २८ (२ छक्का, १ चौका) र दीपेन्द्रसिंह ऐरीले १४ रन (१ चौका) अविजित रहेर टोलीलाई जिताए ।
बलिङतर्फ जापानका शोमा स्लेटरले ४ ओभरमा २२ रन खर्चेर २ विकेट लिए ।
यसअघि टस जितेर ब्याटिङ गरेको जापानले २० ओभरमा ८ विकेट गुमाउँदै १ सय ३१ रन बनाएको थियो । जापानका केन्डेल काडोवाकी–फ्लेमिङ र इसाम रहमानले दोस्रो विकेटमा ८६ रनको साझेदारी गर्दै उत्कृष्ट पुनरागमन गरेका थिए ।
नेपालका लागि दीपेन्द्रसिंह ऐरीले सिधा थ्रोमार्फत अभिषेक आनन्दलाई रनआउट गरी जापानलाई शुरुवातमै दबाबमा पारेका थिए ।
