श्रीशैल्य मल्लिकार्जुन धाममा कात्तिक १७ र १८ गते हुने शिखर पूजन, दर्शन जात्रा र रात्रिकालीन ऐतिहासिक विशाल जात्रालाई शान्तिपूर्ण, मर्यादित र सुसंस्कृत रूपमा सम्पन्न गर्न मालिकार्जुन गाउँपालिका–३ मा सर्वपक्षीय भेला सम्पन्न भएको छ।
मालिकार्जुन विकास समितिका अध्यक्ष धिरेन्द्रसिं धामीको अध्यक्षतामा सम्पन्न भेलामा गाउँपालिका अध्यक्ष हिरा सिंह धामी, शैल्यशिखर नगरपालिका प्रमुख विजय सिंह धामी, प्रमुख जिल्ला अधिकारी, उपाध्यक्ष कल्याण सिंह धामी, महाकाली नगरपालिकाकी उपप्रमुख, तीन वटै सुरक्षा निकायका जिल्ला प्रमुखहरू, स्थानीय तहका कार्यकारी अधिकृतहरू, वडाध्यक्षहरू, पत्रकार महासंघका प्रतिनिधि, राजनीतिक दल, समाजसेवी, बुद्धिजीवी, महिला तथा युवातहका प्रतिनिधिहरूको सहभागिता रहेको थियो।
भेलामा मादक पदार्थको बिक्री–वितरण नियन्त्रण, अवैध हतियार प्रयोग रोकथाम, ट्राफिक व्यवस्थापन, हेल्थ डेस्क र एम्बुलेन्स सेवा सञ्चालन र जात्राको दिन राति १२ बजेदेखि बिहान ६ बजेसम्म अत्यावश्यक बाहेक सवारी साधनमा रोक लगाउने लगायतका प्रस्तावहरू एकमतले पारित गरिएका छन्।
भक्तजनहरूको सुरक्षित यात्रा सुनिश्चित गर्न सबै पक्ष प्रतिबद्ध रहेको जनाइएको छ। साथै यही निर्णय १३ गते लटिनाथ मन्दिर रिठाचौपातामा हुने जात्रामा पनि लागू हुने निर्णय गरिएको छ।
कार्यक्रममा सकारात्मक सोच विकास, स्थानीय संस्कृतिको संरक्षण, र युवा पुस्तालाई (Gen-Z) नशाबाट टाढा रहँदै सामाजिक रूपान्तरणतर्फ अघि बढ्न प्रेरित गरिँदै सामाजिक जनहितमा जारी सन्देश प्रस्तुत गरिएको थियो।
