वीरगञ्ज — संविधानसभा सदस्य एवं नेपाली कांग्रेस बाराका पूर्वसचिव रामअयोध्या यादवको ७२ वर्षको उमेरमा निधन भएको छ।
लामो समयदेखि मिर्गौला रोगबाट पीडित यादवको आज बिहान वीरगञ्जस्थित हेल्थकेयर अस्पतालमा उपचारको क्रममा निधन भएको हो।
बारा जिल्लाको सुवर्ण गाउँपालिका–२, कवहीजगात निवासी यादव २०७० सालको संविधानसभा निर्वाचनमा नेपाली कांग्रेसबाट बारा क्षेत्र नं. १ बाट निर्वाचित भएका थिए। उनले कांग्रेसको जिल्ला सचिवको जिम्मेवारी पनि सम्हालेका थिए।
उनको निधनप्रति नेपाली कांग्रेसका सभापति शेरबहादुर देउवाले गहिरो दुःख व्यक्त गरेका छन्। शोक सन्देशमार्फत देउवाले लेखेका छन्, ‘संविधानसभा सदस्य एवं बाराका पूर्व जिल्ला सचिव रामअयोध्याप्रसाद यादवको निधनको खबरले मलाई अत्यन्त स्तब्ध र दुःखीत बनाएको छ। स्वर्गीय यादवले नेपाली कांग्रेसको संगठन निर्माण र नेपालको लोकतान्त्रिक आन्दोलनहरूमा निर्वाह गर्नु भएको सक्रिय योगदान पार्टीमा सदा स्मरणीय रहिरहनेछ। उहाँप्रति म भावपूर्ण श्रद्धाञ्जली अर्पण गर्दछु।’
यादवका दुई छोरा, दुई छोरी र श्रीमती छन्। परिवारजन, पार्टी नेता तथा कार्यकर्ता र शुभेच्छुकहरूले उनको निधनप्रति श्रद्धाञ्जली अर्पण गरेका छन्।
