सुनसरीको झुम्का कारागारमा अज्ञात रोग फैलिँदा चार दिनभित्र तीन कैदीको मृत्यु भएको छ। उच्च ज्वरो, श्वासप्रश्वासमा समस्या र वान्ता जस्ता लक्षण देखिएपछि उनीहरूको उपचारका क्रममा मृत्यु भएको हो।
बुधबार राजविराज–८ का ४६ वर्षीय जलेश्वर यादवको धरानस्थित बीपी कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको सुनसरीका प्रहरी प्रमुख एसपी सुमन तिम्सिनाले बताए। यसअघि १५ र १६ गते क्रमशः रामदेव उराव (४८) र सागर राई (२४) को मृत्यु भएको थियो।
हालसम्म १३ जना कैदी उच्च ज्वरोका कारण बीपी प्रतिष्ठानमा उपचाररत छन्। कारागारमा १,७९५ कैदी रहेको र बिरामी बढ्न थालेपछि जिल्ला सुरक्षा समिति सुनसरीले अनुगमन गरी बुधबार रातिदेखि स्वास्थ्य शिविर सञ्चालन गरेको कारागार प्रशासनले जनाएको छ।
