काठमाडौं – सरकारले सूचीकरणका लागि सम्पर्कमा नआएका सबै सामाजिक सञ्जालमा प्रतिबन्ध लगाउने निर्णय गरेको छ। सञ्चार तथा सूचना प्रविधि मन्त्रालयमा सञ्चारमन्त्री पृथ्वीसुब्बा गुरुङको अध्यक्षतामा बिहीबार बसेको बैठकले यस्तो निर्णय गरेको मन्त्रालय स्रोतले जनाएको छ।
मन्त्रिपरिषद्ले भदौ ९ गते सामाजिक सञ्जालहरूलाई सूचीकरणका लागि सार्वजनिक आह्वान गरेको थियो। त्यसपछि भदौ १२ गते मन्त्रालयले सूचना निकाल्दै सूचीकरणका लागि सात दिनको समय सीमा तोकेको थियो। तर तोकिएको समयभित्र केवल पाँचवटा सञ्जाल—टिकटक, भाइबर, निम्बज, विटक र पोपो लाइभ—मात्रै सूचीकरणमा आएका छन्।
मन्त्रालयका अनुसार सम्पर्कमा नआएका अन्य २६ वटा सामाजिक सञ्जाल, जसमा फेसबुक, एक्स (ट्विटर), युट्युबलगायत प्रमुख प्लेटफर्महरू पर्छन्, आजदेखि नै नेपालमा बन्द हुने भएका छन्। यसका लागि मन्त्रालयले नेपाल दूरसञ्चार प्राधिकरणलाई पत्राचार गरी तत्कालै कार्यान्वयन गर्न निर्देशन दिएको हो।
सूचना मन्त्रालय स्रोतका अनुसार, यी सामाजिक सञ्जालहरूले नेपालमा दर्ता प्रक्रिया अघि बढाएमा चरणबद्ध रूपमा पुनः खोलिने व्यवस्था मिलाइएको छ।
यसअघि सर्वोच्च अदालतले अनुमति नलिएका सामाजिक सञ्जाल र ओटीटी (ओभर द टप) एप्समार्फत विज्ञापनसहितका सामग्री प्रसारण नगर्न आदेश दिएको थियो। सो परमादेश कार्यान्वयन गर्दै मन्त्रालयले नेपालमा विदेशी डिजिटल सामग्री प्रसारण गर्न चाहने संस्थाले अनुमति लिनुपर्ने व्यवस्था लागू गर्दै आएको छ।
