कैलालीको अत्तरियास्थित आदर्श गल्लिमा रहेको अनुश्री फार्मेसीमा भीषण आगलागी भएको छ। लक्ष्मी खनालको तीनतले पक्की घरको भुइँतलामा रहेको फार्मेसी गोदाममा बिहीबार बिहान करिब ३:२५ बजे आगलागी भएको इलाका प्रहरी कार्यालय मालाखेतका प्रहरी नायब उपरीक्षक रणबहादुर चन्दले जानकारी दिए।
भीमदत्त नगरपालिका–२ निवासी कविराम तिवारीले सञ्चालन गर्दै आएका उक्त फार्मेसीको गोदाममा रहेका सबै औषधि जलेर नष्ट भएका छन्। आगलागीबाट करिब ५० देखि ५५ लाख रुपैयाँ बराबरको क्षति भएको प्रहरीले जनाएको छ।
मानवीय क्षति भने नभएको र प्रहरी, दमकल तथा स्थानीयको सहयोगमा आगो नियन्त्रणमा लिइएको प्रहरीले जनाएको छ। प्रारम्भिक अनुसन्धानअनुसार विद्युत सर्टका कारण आगलागी भएको हुन सक्ने अनुमान गरिएको छ।
