बैतडी – सुदूरपश्चिम प्रदेशको बैतडी जिल्लास्थित पुर्चौंडी नगरपालिका–८, मल्लादेहीमा रहेका ग्रामीण सडक अवरुद्ध हुँदा स्थानीय बासिन्दा साथै आगामी दशैँ पर्वमा डिलाशैनी भगवती मन्दिरमा आउने श्रद्धालुहरू प्रभावित हुने अवस्था देखिएको छ।
विजया दशैँ नजिकिँदै गर्दा मल्लादेहीस्थित ऐतिहासिक तथा धार्मिक डिलाशैनी भगवती मन्दिरमा हरेक वर्षझैँ यस वर्ष पनि भव्य मेला लाग्ने तयारी भइरहेको छ। तर सडक अबरुद्ध हुँदा आवतजावत, किनमेल तथा दैनिक आवश्यक सामग्री ल्याउन–लैजान गम्भीर समस्या भइरहेको स्थानीयले बताएका छन्।
स्थानीय समाजसेवी वीर बहादुर बोहराले दशैँअघि नै सडकलाई उच्च प्राथमिकतामा राखी मर्मत–सम्भार गरी सञ्चालन गर्न वडा कार्यालय तथा नगर सरकारसँग माग गरेका छन्। उनका अनुसार मन्दिरमा देश–विदेशबाट ठूलो संख्यामा श्रद्धालु आउने भएकाले सडक समस्या समाधान नगरे मेलाको व्यवस्थापन कठिन हुनेछ।
