गोरखा – जेन-जी प्रदर्शनका क्रममा देशका विभिन्न कारागारबाट भागेका १२ जना कैदीबन्दी गोरखामा पक्राउ परेका छन्। जिल्ला प्रहरी कार्यालय गोरखाले कास्की कारागारका सात, केन्द्रीय कारागार जगन्नाथदेवलका तीन, तनहुँ कारागारका एक र बालसुधार गृह सानोठिमी भक्तपुरबाट भागेका एकजनालाई पक्राउ गरेको जनाएको छ।
प्रहरी उपरीक्षक (एसपी) भरतबहादुर विकका अनुसार कास्की कारागारबाट भागेर गोरखा आइपुगेका विक्रम नेपाली, तेन्जिङ रिग्देल लामा, छेवाङ रिजिन लामा, सोनाम ल्याल्जेन लामा, बाबुराम नेपाली, राजेश विश्वकर्मा सुनार र सोनामा दोर्जे लामालाई पक्राउ गरिएको हो।
त्यस्तै केन्द्रीय कारागार जगन्नाथदेवलबाट भागेका भरत ठकुरी, सुमन सुनदास र भुवन तामाङलाई समेत नियन्त्रणमा लिइएको छ। तनहुँ कारागारबाट भागेका विशाल उपरकोटी र बालसुधार गृह सानोठिमी भक्तपुरबाट भागेकी सुस्मा मग्रातीलाई पनि पक्राउ गरी सम्बन्धित कारागार तथा सुधार गृहमा चलान गरिएको प्रहरीको भनाइ छ।
एसपी विकका अनुसार पक्राउ परेकामध्ये अधिकांश गोरखा घर भएका र केही अन्य जिल्लाका बसोबासी रहेका छन्। उनीहरूलाई केही समय जिल्ला प्रहरी कार्यालय गोरखाको थुनुवा कक्षमा राखी आवश्यक कानुनी प्रक्रिया पूरा गरेर सम्बन्धित कारागारमा पठाइएको छ।
प्रदर्शनका क्रममा भागेका कैदीबन्दीसम्बन्धी विस्तृत विवरण सङ्कलन कार्य भइरहेको र अझै खोजतलास जारी रहेको प्रहरीले जनाएको छ।
