काठमाडौँ – नेकपा एमालेका नेता योगेश भट्टराईले प्रतिनिधि सभा सदस्यको हैसियतमा पाएका कूटनीतिक राहदानी (रातो पासपोर्ट) विभागमा फिर्ता गरेका छन्। भट्टराईले आफूले राहदानी विभागमै पुगेर फिर्ता गरेको जानकारी दिएका छन्।
गत भदौ २७ गते प्रतिनिधि सभा विघटन भएको थियो। राहदानी नियमावली २०७७ को नियम १८ अनुसार पदमा नरहेको व्यक्ति एक महिनाभित्र आफ्नो कूटनीतिक वा विशेष राहदानी फिर्ता गर्नुपर्ने प्रावधान छ। नियम १८ को उपनियम १ अनुसार कूटनीतिक वा विशेष राहदानी प्राप्त सरकारी पदमा रहेको व्यक्ति पदबाट अलग भएमा र विदेशमा भए नेपाल फर्किएको मितिले एक महिनाभित्र आफू र परिवारका सदस्यको नाममा जारी राहदानी फिर्ता गर्नु पर्नेछ।
समयमै राहदानी फिर्ता नगरेमा विभागले सो राहदानी रद्द गर्न सक्ने व्यवस्था नियमावलीको उपनियम ३ मा उल्लेख गरिएको छ। त्यहाँ भनिएको छ फिर्ता नभएका कूटनीतिक वा विशेष राहदानी उपनियम (१) वा (२) बमोजिमको अवधि पछि विभागले रद्द गरी अभिलेख राख्नेछ।
सांसदहरूले संघीय संसद् सचिवालयमार्फत पनि आफ्नो रातो पासपोर्ट फिर्ता गर्न सक्ने सुविधा छ। सचिवालयका अनुसार, निवर्तमान सांसद प्रतिमा गौतम, रमा कोइराला पौड्याल, सपना राजभण्डारी, रघुजी पन्त, कान्तिका सेजुवाल र तोसिमा कार्कीले पनि आफ्नो कूटनीतिक राहदानी फिर्ता गरिसकेका छन्।
