धनुषा — धनुषामा यात्रुबाहक बस र अटोरिक्सा आपसमा ठोक्किँदा एकै परिवारका तीन जनासहित चार जनाको ज्यान गएको छ । दुर्घटनामा अन्य दुई बालबालिका गम्भीर घाइते भएका छन् ।
विराटनगरबाट धनगढी जाँदै गरेको सु.प्र ०१–००१ ख ३२८८ नम्बरको बसले विपरीत दिशाबाट आउँदै गरेको प्रदेश २–०१–००१ ह १२३० नम्बरको अटोरिक्सालाई शनिबार साँझ ठक्कर दिएको हो ।
पूर्वपश्चिम राजमार्ग अन्तर्गत गणेशमान चारनाथ नगरपालिका–१, वीरेन्द्र बजारमा भएको उक्त दुर्घटनामा स्थानीय अन्दाजी ४० वर्षीय धनबहादुर पुर्वछाने मगर, ३५ वर्षीय शम्भु पुर्वछाने मगर, ३५ वर्षीय निशा मगर, र अन्दाजी ४० वर्षीय अटोरिक्सा चालक डम्बर राईको घटनास्थलमै मृत्यु भएको इलाका प्रहरी कार्यालय ढल्केबरका प्रहरी निरीक्षक लक्ष्मण तोसीले जानकारी दिए ।
दुर्घटनामा १४ वर्षका शीतल मगर र ९ वर्षका रोशन मगर गम्भीर घाइते भएका छन् । उनीहरूको उपचार जनकपुरधामस्थित न्युरो अस्पतालमा भइरहेको प्रहरीले जनाएको छ ।
इलाका प्रहरी कार्यालय ढल्केबरका अनुसार दुर्घटनाबारे थप अनुसन्धान भइरहेको छ ।
