मकवानपुरको मनहरी गाउँपालिका-६ स्थित सिस्नेरीपखेरा जङ्गलमा सिकार गर्न गएका क्रममा भरुवा बन्दुक पड्किँदा एक जनाको मृत्यु भएको छ।
जिल्ला प्रहरी कार्यालय मकवानपुरका अनुसार राक्सिराङ गाउँपालिका-८ राजराङ्गका ४५ वर्षीय गोपाल ब्लोनले बोकेको भरुवा बन्दुक अचानक पड्किँदा मनहरी गाउँपालिका-६ बालुभञ्जाङ निवासी ५० वर्षीय सेते थिङको घटनास्थलमै मृत्यु भएको हो।
प्रहरी नायब उपरीक्षक पुष्कर बोगटीका अनुसार ब्लोन र थिङ दुवै जना एक-एक थान भरुवा बन्दुक बोकेर सिकार गर्न जङ्गलमा गएका थिए। अगाडि हिँडिरहेका ब्लोन लहरामा अल्झिएर लडेपछि बन्दुक अचानक पड्किएको र पछिपछि आइरहेका थिङलाई गोली लागेको प्रारम्भिक अनुसन्धानबाट खुलेको छ।
घटनापछि इलाका प्रहरी कार्यालय मनहरी र प्रहरी चौकी सुनाचरीबाट खटिएको टोलीले ब्लोनलाई दुवै हतियारसहित नियन्त्रणमा लिएको छ। मृतकको शव परीक्षणका लागि अस्पताल लैजाने तयारी भइरहेको र घटनाबारे थप अनुसन्धान भइरहेको प्रहरीले जनाएको छ।
