भैरहवा–परासी सडक खण्डअन्तर्गत रोहिणी गाउँपालिका वडा नम्बर ३, परासीझुवामा रोकिराखेको ट्रकमा मोटरसाइकल ठोक्किँदा दुई युवकको ज्यान गएको छ। दुर्घटनामा ओमसतिया गाउँपालिका वडा नम्बर ३ का २१ वर्षीय राजु हरिजन र सोही स्थानका २३ वर्षीय रोहित यादवको मृत्यु भएको रूपन्देही प्रहरी प्रवक्ता प्रहरी नायब उपरीक्षक सुरज कार्कीले जानकारी दिए।
आज बिहान करिब ६ बजे परासीबाट भैरहवातर्फ आउँदै गरेको ग ११ प ८६२५ नम्बरको मोटरसाइकल रोकिरहेको एचआर ५५ डब्लु ०३१ नम्बरको भारतीय ट्रकमा ठोक्किएको थियो। गम्भीर घाइते भएका दुबैलाई तत्काल भैरहवास्थित युनिभर्सल कलेज अफ मेडिकल साइन्सेज पुर्याइए पनि उपचारका क्रममा मृत्यु भएको प्रहरीले जनाएको छ। दुर्घटनामा संलग्न ट्रक र चालकलाई नियन्त्रणमा लिई थप अनुसन्धान भइरहेको छ।
यसैबीच सिद्धार्थनगर नगरपालिका वडा नम्बर ३, दरखस्वामा एक महिलाको शव पानीमा अर्धडुबेको अवस्थामा फेला परेको छ। आज बिहान करिब सवा ८ बजे नारायण सिंह थापाको खाली जग्गामा जमेको पानीमा करिब ६५ वर्षीया महिलाको शव देखेपछि स्थानीयले प्रहरीलाई खबर गरेका थिए।
हालसम्म मृतक महिलाको नाम, थर र ठेगाना खुलेको छैन। घटनाको प्रकृति, मृत्युको कारण र पहिचान खुलाउन जिल्ला प्रहरी कार्यालय रूपन्देहीबाट विशेषज्ञ टोली खटिएर अनुसन्धान भइरहेको सूचना अधिकारी कार्कीले बताए।
