धादिङमा मध्यराति भएको बस दुर्घटनामा १७ जनाको घटनास्थलमै मृत्यु भएको छ भने २४ जना घाइते भएका छन्। बसमा करिब ४६ यात्रु रहेको अनुमान गरिएको भए पनि संख्या अझै यकिन भइसकेको छैन।
प्रहरीका अनुसार राति करिब साढे १ बजे बेनिघाट रोराङ्ग गाउँपालिका-५ भैंसिगौडास्थित पृथ्वी लोकमार्गमा पोखराबाट काठमाडौंतर्फ आउँदै गरेको ग १ ख १४२१ नम्बरको यात्रुबाहक बस त्रिशूली नदीको किनारमा खसी दुर्घटना भएको थियो।
दुर्घटनापछि उद्धारका लागि सशस्त्र प्रहरी बल नेपालको विपद् व्यवस्थापन तालिम शिक्षालय, कुरिनटारबाट गोताखोरसहितको टोली खटिएको थियो। साथै नेपाल प्रहरी र नेपाल सेनाको टोली पनि उद्धारमा परिचालित भएका थिए।
मृत्यु भएका १७ जनाको शव घटनास्थलमै रहेको जनाइएको छ। रातिको समय भएकाले उद्धार कार्यमा कठिनाइ भएको प्रहरी स्रोतले जनाएको छ। घाइते २४ जनालाई उद्धार गरी विभिन्न अस्पतालमा पठाइएको सशस्त्र प्रहरीका सहप्रवक्ता डीएसपी शैलेन्द्र थापाले जानकारी दिए।
घाइते तथा मृतकको सनाखत हुन बाँकी रहेको छ। दुर्घटनाको कारण भने अझै खुलेको छैन। प्रहरीले घटनाबारे थप अनुसन्धान गरिरहेको जनाएको छ।
