जिल्ला प्रशासन कार्यालय कैलालीले प्रतिनिधि सभा सदस्य निर्वाचनलाई लक्षित गर्दै कैलाली जिल्लाका सम्पूर्ण सीमा नाकाहरू अस्थायी रूपमा बन्द रहने सूचना जारी गरेको छ।
कार्यालयद्वारा जारी सूचनाअनुसार २०८२ साल फागुन २२ गते हुने प्रतिनिधि सभा सदस्य निर्वाचनलाई स्वतन्त्र, निष्पक्ष र भयमुक्त वातावरणमा सम्पन्न गर्न भारतसँग जोडिएका कैलाली जिल्लाका सबै सीमा नाकाहरू बन्द गरिने भएको हो।
सूचनामा उल्लेख भएअनुसार फागुन १८ गते (तदनुसार 02-March-2026) सोमबार राति १२:०० बजेदेखि फागुन २१ गते (तदनुसार 05-March-2026) बिहीबार राति १२:०० बजेसम्म सीमा नाकाहरू बन्द रहनेछन्।
यद्यपि एम्बुलेन्स, अत्यावश्यक सेवा, शव वाहन, अस्पताल सेवा तथा विद्युत् सेवा जस्ता अत्यावश्यक सेवासम्बन्धी सवारी साधन, कूटनीतिक नियोगका सवारी साधन र अनुमति प्राप्त सवारी साधनहरूलाई भने सञ्चालनमा छुट दिइने जनाइएको छ।
कार्यालयले निर्वाचनको समयमा सुरक्षा र व्यवस्थापनलाई प्रभावकारी बनाउन उक्त निर्णय गरिएको स्पष्ट पारेको छ।
