जनता समाजवादी पार्टी नेपालका सिरहा-३ का उम्मेदवार अशेश्वर यादव मौन अवधिको समयमा नगद रकमसहित पक्राउ परेपछि हिरासतबाट रिहा भएका छन्।
जिल्ला मुख्य निर्वाचन अधिकृत श्रीप्रकाश उप्रेतीका अनुसार तीन दिनभित्र चित्तबुझ्दो स्पष्टीकरण पेश गर्ने सर्तमा यादवलाई छाडिएको हो। उनी नेपाल-भारत सीमाक्षेत्र अन्तर्गत माडरबाट ४ लाख ८७ हजार रुपैयाँसहित पक्राउ परेका थिए।
संयुक्त चेकजाँचका क्रममा प्रदेश २-०२-००१ च ०८७ नम्बरको स्कारपियो गाडीबाट गएराति करिब साढे १२ बजे शिवचोकमा उनलाई नियन्त्रणमा लिइएको थियो। यादवसँगै पक्राउ परेका अन्य चारजनालाई पनि सोही सर्तमा रिहा गरिएको निर्वाचन कार्यालयले जनाएको छ।
पक्राउ पर्नेमा बिष्णुपुर-५ लक्ष्मिपुरका ३२ वर्षीय श्यामकुमार यादव, ३५ वर्षीय रामप्रवेश यादव, ४० वर्षीय बप्रेन्द्रकुमार यादव तथा नरहा-३ का २८ वर्षीय सवारी चालक जितेन्द्रकुमार महतो रहेका छन्।
निर्वाचन अधिकृत उप्रेतीले सम्पूर्ण कागजात अध्ययनपछि तत्काललाई तीन दिनभित्र स्पष्टीकरण बुझाउने मौका दिइएको जानकारी दिएका छन्। उहाँहरूले बुझाएको स्पष्टीकरण र प्रमाणका आधारमा थप प्रक्रिया अगाडि बढाइनेछ उनले बताएका छन्।
बरामद नगद रकम र सवारी साधनसहितका सामग्री भने हाललाई सिज गरिएको छ। आयोगले पाँचै जनालाई तीन दिनभित्र चित्तबुझ्दो जवाफ पेश गर्न निर्देशन दिएको छ।
मौन अवधिमा ठूलो रकमसहित उम्मेदवार पक्राउ परेपछि सिरहाको राजनीतिक वृत्तमा चासो र चर्चा बढेको छ।
