गण्डकी प्रदेशका १८ वटै प्रतिनिधिसभा निर्वाचन क्षेत्रको अन्तिम परिणाम सार्वजनिक भएको छ। प्रदेशभर सबैभन्दा पहिले मुस्ताङको नतिजा सार्वजनिक भएको थियो भने अन्तिममा गोरखा-१ को नतिजा सार्वजनिक भएको हो।
यसपटकको निर्वाचनमा राष्ट्रिय स्वतन्त्र पार्टी (रास्वपा) गण्डकी प्रदेशमा पहिलो दल बनेको छ। १८ सिटमध्ये रास्वपाले १५ सिट जितेको छ। नेपाली कांग्रेसले २ सिट जितेको छ भने बाँकी एक सिट स्वतन्त्र उम्मेदवारले हात पारेका छन्। नेकपा एमालेले भने यस प्रदेशका कुनै पनि क्षेत्रमा जित हासिल गर्न सकेन।
हिमाली जिल्ला मनाङ र मुस्ताङमा नेपाली कांग्रेसले चुनाव जितेको छ। मनाङमा टेकबहादुर गुरुङ र मुस्ताङमा योगेश गौचन विजयी भएका हुन्।
गण्डकीका ८ जिल्लामा रास्वपाले क्लिन स्वीप गरेको छ। गोरखाका दुवै क्षेत्र, कास्कीका तीन क्षेत्र, तनहुँका दुवै क्षेत्र, नवलपुरका दुवै क्षेत्र, स्याङ्जाका दुवै क्षेत्र र बागलुङका दुवै क्षेत्रमा रास्वपाका उम्मेदवारहरू विजयी भएका छन्। यस्तै पर्वत र लमजुङमा पनि रास्वपाले जित निकालेको छ।
म्याग्दीमा भने स्वतन्त्र उम्मेदवार महावीर पुन रास्वपाको समर्थनमा विजयी भएका छन्।
कास्की क्षेत्र नम्बर १ मा खडकराज पौडेल (गनेस), क्षेत्र नम्बर २ मा उत्तमप्रसाद पौडेल र क्षेत्र नम्बर ३ मा बिना गुरुङ विजयी भएका छन्। गोरखा-१ मा सुदन गुरुङ विजयी हुँदा गोरखा-२ बाट कविन्द्र बुर्लाकोटीले जित दर्ता गरेका छन्। लमजुङमा धर्म केसी विजयी भएका छन्।
तनहुँ-१ मा डा. स्वर्णिम वाग्ले विजयी भएका छन् भने तनहुँ-२ मा श्रीराम न्यौपानेले जित हासिल गरेका छन्। नवलपुर-१ मा राजन गौतम र नवलपुर-२ मा मनिष खनाल निर्वाचित भएका छन्। स्याङ्जा-१ मा डा. धनञ्जय रेग्मी र स्याङ्जा-२ मा झविलाल डुम्रे विजयी भएका छन्। पर्वतमा सागर भुसाल विजयी भएका छन्। बागलुङ-१ मा सुशील खड्का र बागलुङ-२ मा सोम शर्माले जित हासिल गरेका छन्।
उमेरका हिसाबले सबैभन्दा कान्छा सांसद नवलपुर-२ बाट निर्वाचित मनिष खनाल हुन्, उनी २६ वर्षका छन्। त्यसपछि मुस्ताङका सांसद योगेश गौचन ३२ वर्षका छन्। गण्डकीबाट निर्वाचित ७ जना सांसद ४० वर्षमुनिका छन्। सुदन गुरुङ, राजन गौतम, झविलाल डुम्रे, सुशील खड्का र सोम शर्मा पनि ४० वर्षभन्दा कम उमेरका हुन्।
यस्तै ५० वर्षमुनिका ५ जना सांसद छन् भने ६ जना ५० वर्षमाथिका छन्। कविन्द्र बुर्लाकोटी, धर्म केसी, खडकराज पौडेल, उत्तमप्रसाद पौडेल र सागर भुसाल ४० वर्ष कटेका तर ५० वर्षमुनिका सांसद हुन्। टेकबहादुर गुरुङ र महावीर पुन समान ७१ वर्षका छन्।
गण्डकीबाट दलित समुदायका एक जना पनि प्रत्यक्षतर्फ निर्वाचित हुन सकेनन्। आदिवासी जनजातिबाट भने ४ जना निर्वाचित भएका छन्। समानुपातिकतर्फ मतगणना जारी रहेकाले विभिन्न क्लस्टरबाट सांसदहरू आउने अपेक्षा गरिएको छ।
