सुर्खेत — बलात्कारपछि हत्या गरिएकी सुर्खेतकी १६ वर्षीया इनिशा विकको शव २७ दिनपछि परिवारले आज (चैत १९) बुझ्ने भएका छन्। पारिवारिक स्रोतका अनुसार आजै भेरी नदीमा उनको दाहसंस्कार गरिने तयारी गरिएको छ।
इनिशालाई न्याय दिलाउनुपर्ने माग गर्दै परिवारले यसअघि शव बुझ्न अस्वीकार गर्दै आएका थिए। तर मंगलबार जिल्ला अदालत सुर्खेतले बलात्कारपछि हत्या आरोपमा पक्राउ परेका चार जना नाबालकलाई पुर्पक्षका लागि बाल सुधारगृह पठाउन आदेश दिएपछि परिवारले शव बुझ्ने निर्णय गरेको हो।
गुर्भाकोट नगरपालिका–६ बडाखोली स्थायी घर भएकी इनिशा विक हाल वीरेन्द्रनगर नगरपालिका–१ मा परिवारसँग बस्दै आएकी थिइन्। उनी वीरेन्द्रनगर–६ स्थित उषा बालबाटिका विद्यालयमा कक्षा ११ मा अध्ययनरत थिइन्।
फागुन २३ गते बिहान ‘प्रयोगात्मक परीक्षा छ’ भन्दै घरबाट निस्किएकी इनिशा करिब बिहान ९ बजेतिर वीरेन्द्रनगर–४ स्थित सहिद पार्क नजिकैको जंगलमा बेहोस अवस्थामा भेटिएकी थिइन्। उपचारका क्रममा उनको मृत्यु भएपछि घटनाले देशभर ठूलो आक्रोश र न्यायको माग उठेको थियो।
यस घटनामा संलग्न रहेको आरोपमा प्रहरीले चार जना नाबालकलाई पक्राउ गरेको थियो। अदालतले उनीहरूलाई पुर्पक्षका लागि बाल सुधारगृह पठाउने आदेश दिएको छ।
इनिशाको मृत्युले सुर्खेत मात्र नभई देशभर शोक र आक्रोशको वातावरण सिर्जना गरेको छ। परिवार र स्थानीयवासीले दोषीलाई कडा कारबाही हुनुपर्ने माग गर्दै आएका छन्।
