दाङ — दाङको लमही नगरपालिकामा प्रहरीले दुर्लभ वन्यजन्तु पाटे बाघको छालासहित ३ जनालाई पक्राउ गरेको छ। पक्राउ परेकामा राजपुर गाउँपालिका–१ का ५३ वर्षीय केशवराज सेन ठकुरी, वडा नं. ६ का ४१ वर्षीय विक्रम बुढामगर र बर्दियाका ३३ वर्षीय बनिल थारु रहेका छन्।
जिल्ला प्रहरी कार्यालय दाङका डीएसपी चक्रबहादुर शाहका अनुसार, गोप्य सूचनाका आधारमा वडा प्रहरी कार्यालय, लमहीबाट प्रहरी निरीक्षक रोशनराज पाण्डेयको कमाण्डमा खटिएको प्रहरी टोलीले बाघको छालाको अवैध कारोबार भइरहेको भन्ने सूचना पाएपछि छापा मारेको थियो।
आइतबार बिहान मध्यराति विक्रम बुढामगरको घरमा छापा मार्दा प्लास्टिकको जेब्रा झोलाभित्र लुकाइएको अवस्थामा शिरदेखि पुच्छरसम्म ९ फिट २ इञ्च लम्बाइको पाटे बाघको छाला फेला परेको डीएसपी शाहले जानकारी दिए।
प्रहरीले थप अनुसन्धान अघि बढाएको जनाएको छ।
