कैलाली – लम्कीचुहा नगरपालिका वडा नम्बर १ मा अवस्थित शहिद स्मृति माध्यमिक विद्यालयमा आज एक भव्य कार्यक्रमको आयोजना गरी विद्यालय भवन उद्घाटन, शिक्षक विदाई, शिक्षक सम्मान तथा अभिभावक भेला कार्यक्रम सम्पन्न भएको छ।
कार्यक्रम विद्यालय व्यवस्थापन समितिका अध्यक्ष गणेशप्रसाद ढकालको सभापतित्वमा सम्पन्न भएको हो। कार्यक्रमका प्रमुख अतिथि लम्कीचुहा नगरपालिकाकी नगर प्रमुख सुशीला शाही रहनु भएकी थिइन्।
विद्यालयका शिक्षक रंगप्रसाद तिमिल्सेनाले सञ्चालन गर्नुभएको उक्त कार्यक्रममा विभिन्न अतिथि, अभिभावक, शिक्षक, विद्यार्थी तथा स्थानीय समुदायको उल्लेखनीय उपस्थिति रहेको थियो।
नगर प्रमुख शाहीको प्रतिबद्धता : ‘शिक्षा मेरो प्राथमिकता’
कार्यक्रममा प्रमुख अतिथिका रूपमा बोल्दै नगर प्रमुख शाहीले लम्कीचुहा नगरपालिकाले शिक्षा क्षेत्रलाई विशेष प्राथमिकतामा राखेर ठुलो बजेट विनियोजन गरेको जानकारी दिनुभयो। उहाँले नगरपालिकाले भौतिक पूर्वाधार, शैक्षिक गुणस्तर, डिजिटल पहुँच र विद्यार्थी सुविधा विस्तारमा निरन्तर ध्यान दिइरहेको बताउनुभयो।
शिक्षकहरूको योगदानको खुलेर प्रशंसा गर्दै उहाँले शिक्षकहरूको हितमा आफू सदैव क्रियाशील रहने प्रतिबद्धता व्यक्त गर्नुभयो। उहाँले, “मजस्ता नगर प्रमुख सबै शिक्षकले पाउँदैनन्, म सधैं शिक्षकका पक्षमा छु,” भन्दै विद्यालयको शैक्षिक र भौतिक विकासमा निरन्तर सहयोग रहने विश्वास व्यक्त गर्नुभयो। साथै, नगर प्रमुख शाहीले शहिद स्मृति माध्यमिक विद्यालयमा एउटा नयाँ भवन निर्माण गर्ने प्रत्यक्ष प्रतिबद्धता पनि जनाउनुभयो।
कार्यक्रमको क्रममा विद्यालय व्यवस्थापन समितिका अध्यक्ष गणेशप्रसाद ढकालले प्रमुख अतिथि नगर प्रमुख शाहीलाई विद्यालयका आवश्यक पूर्वाधार निर्माण सम्बन्धी मागपत्र पनि बुझाउनु भयो।
मागपत्रमा विद्यालयको चारकोठे प्रशासनिक भवन निर्माण, दुई कोठे भवनको तला थप, घेरा पर्खाल, खेलमैदान निर्माण, विद्यालय परिसरमा सिसी क्यामेरा जडान र सुन्दर फूलबारी निर्माण जस्ता आवश्यकताहरू समेटिएको छ।
सभाध्यक्षका रूपमा मन्तव्य राख्दै अध्यक्ष ढकालले विद्यालयले शैक्षिक उपलब्धिसँगै खेलकुदमा समेत सशक्त योगदान दिएको उल्लेख गर्नुभयो। उहाँले यस विद्यालयबाट राष्ट्रिय स्तरका खेलाडीहरू उत्पादन भइसकेको र यस वर्ष कक्षा ८ को नतिजा पनि अत्यन्त सन्तोषजनक रहेको जानकारी दिनुभयो।
कार्यक्रमको क्रममा विद्यार्थीहरूले प्रस्तुत गरेका सांस्कृतिक नृत्यहरूले कार्यक्रमलाई थप आकर्षक र रंगीन बनाएको थियो। स्थानीय संस्कृति झल्किने नृत्य र प्रस्तुतीहरूले दर्शकहरूलाई मन्त्रमुग्ध पारेका थिए।
कार्यक्रममा स्थानीय अभिभावकहरूको उत्साहजनक उपस्थिति देखिएको थियो। उनीहरूले विद्यालयको प्रगतिको प्रशंसा गर्दै शैक्षिक गुणस्तर अझै माथि लैजान स्थानीय तह र समुदाय मिलेर सशक्त भूमिका निर्वाह गर्नुपर्नेमा जोड दिएका थिए।
