बाजुरा – सुदूरपश्चिम क्षेत्रको बाजुरा जिल्लास्थित ऐतिहासिक, पुरातात्त्विक तथा धार्मिक महत्वको बडीमालिका मन्दिरको पुनर्निर्माण कार्य सम्पन्न भएको छ। नेपाली सेनाले मिति २०८१ साल चैत्र २८ गतेबाट सुरु गरेको मन्दिर पुनर्निर्माण कार्य २०८२ साल असार २३ गते सम्पन्न भएको हो।
समुद्री सतहदेखि करिब ४२२० मिटर उचाइमा अवस्थित मल्लागिरी पर्वतमा रहेको बडीमालिका मन्दिरलाई नेपाली सेनाले संरक्षण, संवर्द्धन र प्रवर्धन गर्ने उद्देश्यले पुनर्निर्माण कार्य अघि बढाएको थियो। धार्मिक आस्थाको केन्द्रको रूपमा रहेको यस मन्दिरमा प्रत्येक वर्ष हजारौँ श्रद्धालुहरूको बाक्लो उपस्थिति रहने गर्दछ।
पुनर्निर्माण सम्पन्न भएपछि मन्दिर क्षेत्रको धार्मिक, सांस्कृतिक र पर्यटकीय महत्व अझ बढ्ने विश्वास गरिएको छ। नेपाली सेनाले कठिन भौगोलिक परिवेशमा समेत मन्दिर पुनर्निर्माण कार्य समयमै सम्पन्न गरी धार्मिक सम्पदाप्रतिको आफ्नो दायित्व निभाएको जनाएको छ।
