बैतडी – बैतडी जिल्लाको पाटन नगरपालिका–९ मा अवस्थित ज्ञानेश्वर माध्यमिक विद्यालयले ‘केन्द्रबिन्दु एजुकेशन एक्सिलेन्स अवार्ड २०८२’ प्राप्त गर्न सफल भएको छ। शैक्षिक गुणस्तर सुधारमा दिएको अतुलनीय योगदानका आधारमा केन्द्रबिन्दु अनलाइन मिडिया प्रालिले उक्त सम्मान प्रदान गरेको हो।
विद्यालयलाई प्रदान गरिएको विशेष शिक्षा सम्मान पत्रमा निजिकरणको चुनौतीबीच सामुदायिक विद्यालयहरूले पनि उत्कृष्ट शैक्षिक उपलब्धि हासिल गर्न सक्छन् भन्ने उदाहरण ज्ञानेश्वर माविले प्रस्तुत गरेको उल्लेख गरिएको छ।
शुक्रवार काठमाण्डौंमा आयोजित विशेष समारोहमा शिक्षा, विज्ञान तथा प्रविधि मन्त्री रघुजी पन्तको प्रमुख आतिथ्यमा विद्यालयका प्रधानाध्यापक पुष्प जोशीलाई उक्त अवार्ड प्रदान गरिएको हो।
कार्यक्रम ‘तेस्रो संस्करणको केन्द्रबिन्दु प्लस टु एजुकेसन एक्सिलेन्स अवार्ड २०८२’ अन्तर्गत सम्पन्न भएको थियो।
सोही अवसरमा संस्कारशिरोमणि ज्योतिषाचार्य पण्डित गणेश प्रसाद पन्त पञ्चाङ्गकारले आफूले १० कक्षासम्म अध्ययन गरेको यही विद्यालयले अवार्ड प्राप्त गरेकोमा अत्यन्तै खुसी लागेको प्रतिक्रिया दिंदै दैलेख कर्णाली टेलिभिजनलाई जानकारी दिनुभयो।
