जाजरकोट – गए राति जाजरकोटको नलगाड नगरपालिकाबाट रिम्नातर्फ जाँदै गरेको टिपर भेरी नदीमा खस्दा तीन जना बेपत्ता भएका छन्।
भेरी करिडोर निर्माण कार्यमा खटिएको यती विल्डर्सको रा १ क १५०१ नम्बरको टिपर रुकुमपश्चिमको आठबीसकोट नगरपालिका–१४, पिपलचौरस्थित भेरी नदीमा खसेको हो।
इलाका प्रहरी कार्यालय रिम्नाका प्रहरी नायब निरीक्षक (सइ) शिउकुमार चौधरीका अनुसार टिपरमा चालकसहित तीन जना सवार थिए, जसको अवस्था हालसम्म अज्ञात छ।
घटनापछि बेपत्ता भएकाको खोजीका लागि रुकुमपश्चिम र जाजरकोटबाट प्रहरी टोली परिचालन गरिएको छ। तर, भेरी नदीमा पानीको सतह उच्च भएकाले खोजी कार्यमा कठिनाइ भइरहेको चौधरीले जानकारी दिए।
बेपत्ता व्यक्तिहरूको नाम र ठेगाना भने हालसम्म नखुलेको प्रहरीले जनाएको छ। घटनाबारे थप अनुसन्धान भइरहेको छ।
