बैतडी – पाटन नगरपालिका–८ खोड्पे जसुलीखाली निवासी संस्कारशिरोमणी ज्योतिषाचार्य गणेशप्रसाद पन्त विगत २६ वर्षदेखि दलित समुदायका घर–घरमा पुगी वैदिक विधिबाट विभिन्न धार्मिक कर्मकाण्ड गर्दै आएका छन्। समाजमा रहेका जातीय विभेद र धार्मिक कुरीति अन्त्य गर्ने लक्ष्यसहित उनले यो अभियान अघि बढाइरहेका छन्।
पन्तका अनुसार यसबीचमा उनलाई धम्की र दबाब आइरहे पनि उनले आफ्नो अठोट छोड्ने सोच बनाएका छैनन्। ज्यान मार्ने धम्कीसमेत आए तापनि दलित समुदायका संस्कार र कर्मकाण्डलाई निरन्तरता दिन्छु उनले बताए।
पन्तले अहिलेसम्म दलित बस्तीमा ३० वटा सप्ताह १४ वटा शिवपुराण ६२ वटा लघु रुद्राभिषेकसहित न्वारन, व्रतबन्ध, विवाह, सत्यनारायण पूजन, ग्रहशान्ति, शतचण्डी, अखण्ड रामायण लगायत १४९ भन्दा बढी धार्मिक अनुष्ठान सम्पन्न गराइसकेका छन्।
साथै उनले आचार्य कृष्ण दमाईँसहित १४९ जना शिल्पी समुदायका व्यक्तिलाई जनैधारण गराएको र पशुपति कोटिहोममा प्रवचनसम्म दिलाएको स्मरण गराए। दलित समुदायबीच समेत पानी–भान्सा नचल्ने प्रथा, अथवा अथर्ववेदलाई ‘दलितको वेद’ भन्दै सन्ध्यापूजामा भुइँमा पानी खसाल्ने प्रथा जस्ता गलत संस्कार हटाउनुपर्नेमा पन्तले जोड दिएका छन्।
मोबाइलदेखि हवाईजहाजसम्मको आविष्कार अथर्ववेदकै ज्ञानबाट सम्भव भएको छ। त्यसको उपयोग सबैले गर्छन् तर त्यसैको शिल्पकारलाई विभेद गर्नु गलत हो पन्तले भने। दलित बस्तीमा कर्मकाण्ड गर्न थालेपछि पन्तले आफ्ना पुर्ख्यौली ५७५ यजमान गुमाएका छन्। सामाजिक सञ्जालमार्फत गालीगलौज र अपमान सहनुपरे पनि आफू धर्म–कर्मबाट विचलित नभएको उनले बताए।
उनको मागमा दलितमाथि विभेद गर्नेहरूलाई कानुन अनुसार कारबाही गर्नुपर्छ, विभेदकारी ग्रन्थहरू संशोधन हुनुपर्छ, र सबै धार्मिक क्षेत्रहरूमा सबैका लागि समान अवसरसहित पूजा–पाठको व्यवस्था हुनुपर्छ।
पन्तले प्रत्येक हिन्दु घरमा वेद, पुराण, शालिग्राम, तुलसी, शङ्ख–घण्ट र पाञ्चायन देवता स्थापना गराउने योजना बनाएका छन्।
धार्मिक सेवाका लागि उनले आफ्नो सम्पर्क नम्बर ९८६०२७८१०० सार्वजनिक गरेका छन्।
