रुपन्देही क्षेत्र नम्बर–३ को उपनिर्वाचनमा राष्ट्रिय स्वतन्त्र पार्टी (रास्वपा)ले वरिष्ठ न्युरोलोजिस्ट डा. लेखजंग थापालाई उम्मेदवार बनाएको छ।
पार्टी सचिवालय बैठकले ९ जना आकांक्षीमध्येबाट थापाको नाम सार्वजनिक गरेको हो। थापासहित सुलभ खरेल, ज्ञानु पौडेल, जितबहादुर गुप्ता, मधुप्रसाद अर्याल, पार्थिवेन्द्र उपाध्याय, कुसुम महर्जन, पुनमकुमारी अग्रवाल र रचना क्षेत्री आकांक्षी बनेका थिए।
उम्मेदवार चयनका लागि रास्वपाले १२ भदौ बिहान ७ बजेदेखि साँझ ७ बजेसम्म अनलाइन माध्यमबाट प्राइमेरी इलेक्सन गरेको थियो। भोटिङमा सबैभन्दा बढी समर्थन पाएका थापालाई अन्तिम उम्मेदवार घोषणा गरिएको पार्टीको दाबी छ।
डा. थापा एमबीबीएस, इन्टरनल मेडिसिनमा एमडी तथा न्युरोलोजीमा एमडी गरेका वरिष्ठ चिकित्सक हुन्। हाल उनी काठमाडौं महाराजगञ्जस्थित नेसनल न्युरो सेन्टरको न्युरोलोजी विभाग प्रमुख तथा नेपाल स्ट्रोक एसोसिएसनका संस्थापक अध्यक्षसमेत हुन्।
