रसुवाको गोसाईकुण्ड गाउँपालिका–६ सोलेस्थित खोलामा मोटरसाइकल दुर्घटनामा परेका दुई जनाको शव फेला परेको छ।
सशस्त्र प्रहरी बलका सहप्रवक्ता डिएसपी शैलेन्द्र थापाका अनुसार भदौ १५ गतेदेखि बेपत्ता रहेका ठाडे बस्ने २४ वर्षीय सुदिप घले र २३ वर्षीय दावा डेण्डुप तामाङको शव मंगलबार फेला परेको हो।
उनीहरू एएए–३८१७ नम्बरको मोटरसाइकलमा धुन्चेतर्फ गएका थिए। तर सम्पर्क विच्छेद भएपछि आफन्तले भदौ १७ गते बिहान प्रहरीमा निवेदन दिएका थिए।
धुन्चे चेकपोस्टको सिसिटिभी फुटेजमा भदौ १५ गते राति करिब १० बजे उनीहरू मोटरसाइकलमा ठाडेतर्फ जाँदै गरेको देखिएपछि नेपाली सेना, नेपाल प्रहरी र सशस्त्र प्रहरीले संयुक्त रूपमा खोजतलास थालेका थिए।
घटनास्थलअनुसार मोटरसाइकल सडकबाट करिब २५० मिटर तल खोलामा खसेको देखिएको डिएसपी थापाले जानकारी दिए। दुवै जनाको शव रोप रेस्क्यु विधिबाट निकालिएको उनले बताए।
