देशैभर प्रतिनिधिसभा सदस्य चयनका लागि मतदान जारी रहेको छ। बिहीबार बिहान ७ बजेदेखि सुरु भएको मतदानमा मतदाताको उल्लेखनीय सहभागिता देखिएको छ।
निर्वाचन आयोगका अनुसार मतदान सुरु भएको करिब दुई घण्टाभित्रै देशभर साढे ८ लाख मत खसेको छ। बिहान ९ बजेसम्म देशका १ सय ६५ वटै निर्वाचन क्षेत्रका मतदानस्थलहरूमा करिब ८ लाख ५० हजार मत खसेको जानकारी आयोगले दिएको हो।
देशभरका मतदान केन्द्रहरूमा बिहानैदेखि मतदाताको उपस्थिति बढ्दै गएको छ। विभिन्न स्थानमा मतदाताहरू लाइनमा बसेर मतदान गरिरहेका छन्।
निर्वाचन आयोगले बिहीबार साँझ ५ बजेसम्म मतदानको समय निर्धारण गरेको छ। मतदातालाई आफ्नो अमूल्य मत खसालेर लोकतान्त्रिक अधिकार प्रयोग गर्न आयोगले आग्रह गरेको छ।
