काठमाडौं – हिन्दु नेपालीहरूको महान् पर्व विजया दशमी (बडादसैँ) आजदेखि सुरु भएको छ । हरेक वर्ष आश्विन शुक्ल प्रतिपदादेखि सुरु हुने यो पर्व आज बिहानै वैदिक विधिअनुसार घटस्थापनासँगै प्रारम्भ भएको हो । नेपाल पञ्चाङ्ग निर्णायक विकास समितिका अनुसार आज बिहान ९ बजेर १३ मिनेटमा घटस्थापनाको उत्तम साइत रहेको छ ।
आजको दिन पूजा कोठा वा दसैँ घरमा दियो, कलश र गणेश स्थापनासहित शक्तिकी अधिष्ठात्री देवी दुर्गाको आह्वान गरी पूजा आरम्भ गरिन्छ । शुद्ध गरिएको स्थानमा बालुवा वा माटो ल्याई जौ रोप्ने परम्परा रहिआएको छ जसलाई जमरा राख्ने भनिन्छ । जमरा विजया दशमीका दिन देवीलाई चढाई टीका प्रसादसँगै ग्रहण गरिन्छ ।
नवरात्रको अवधिभर देवी दुर्गाका नौ रुप – शैलपुत्री, ब्रह्मचारिणी, चन्द्रघण्टा, कुष्माण्डा, स्कन्दमाता, कात्यायनी, कालरात्री, महागौरी र सिद्धिदात्रीको विधिपूर्वक पूजा–आराधना गरिन्छ । असत्यमाथि सत्य र आसुरी शक्तिमाथि दैवी शक्तिको विजयको प्रतीकका रूपमा यो पर्व मनाइन्छ ।
बडादसैँको सातौँ दिन फूलपाती भित्र्याइने परम्परा छ जसको उत्तम साइत समितिले कात्तिक ४ गते बिहान ९ बजेर ३५ मिनेट तोकेको छ । असोज १६ गते बिहान ११ः५३ मा टीका लगाउने उत्तम साइत रहेको समितिले जनाएको छ ।
महाअष्टमी र महानवमीका दिन बलिपूजा गरिन्छ भने पूर्णिमासम्म देवीको प्रसाद, टीका र जमरा ग्रहण गर्ने चलन छ । कोजाग्रत पूर्णिमाको रात महालक्ष्मीको व्रत बस्दै धनधान्य र ऐश्वर्य प्राप्तिको कामना गर्ने धार्मिक परम्परा रहेको छ ।
