दुई दिनदेखिको अविरल वर्षाका कारण भैरहवा आसपासमा अलपत्र परेका यात्रुहरूलाई नेपाल एयरलाइन्सको चार्टर विमानमार्फत काठमाडौं ल्याइने भएको छ। रुपन्देही जिल्ला प्रशासन कार्यालयले आज (आईतबार) साँझ ९ बजे आकस्मिक रूपमा काठमाडौं पुग्नैपर्ने यात्रुहरूका लागि यो व्यवस्था मिलाएको हो।
रुपन्देहीका प्रमुख जिल्ला अधिकारी टोकराज पाण्डेका अनुसार विशेषगरी वैदेशिक रोजगारीका लागि विदेश जानुपर्ने तथा उपचारका सिलसिलामा अलपत्र परेकाहरूलाई प्राथमिकता दिई काठमाडौं पठाइनेछ। उनका अनुसार नेपाल एयरलाइन्सको विमानमार्फत १ सय ५८ जना यात्रुहरूलाई काठमाडौं पठाउने तयारी गरिएको छ।
प्रशासनले अलपत्र यात्रुहरूलाई नेपाल एयरलाइन्सको भैरहवा विमानस्थलस्थित काउन्टरमा गएर आफ्नो समस्या जानकारी गराउन आग्रह गरेको छ। टिकट तथा अन्य जानकारीका लागि नेपाल एयरलाइन्सका कर्मचारी अरुण पन्थी (९८५७०२३६७१) सँग सम्पर्क गर्न सकिने जनाइएको छ।
काठमाडौंबाट साँझ ७ बजे विमान भैरहवा पुग्ने र सोही विमानमार्फत यात्रुहरूलाई राजधानी ल्याउने तयारी गरिएको प्रमुख जिल्ला अधिकारी पाण्डेले बताएका छन्।
