नेकपा एमालेका केन्द्रीय सदस्य अरबिन्द सिंहले संसद् पुनर्स्थापनाको मागसहित आन्दोलनमा जानु पार्टीका लागि घातक हुने चेतावनी दिएका छन्। उनले यस्तो कदमले एमाले र त्यसका नेताहरूलाई आम जनतामाझ घृणा र हाँसोको पात्र बनाउने बताएका छन्।
ललितपुरको भनिमण्डलमा जारी एमाले केन्द्रीय समितिको बैठकमा बोल्दै सिंहले भने दुई-दुई पटक हामी आफैंले संसद् विघटन गरेका हौं। अब संसद् पुनर्स्थापनाको माग गर्दै आन्दोलनमा गए जनता हामीमाथि हाँस्छन्।
उनले आगामी निर्वाचन बहिष्कार गर्नु अर्को भिडन्तको तयारी हुने बताउँदै कमजोरी सच्याउँदै चुनावमा जानु नै एकमात्र विकल्प भएको बताए। सिंहले पार्टीभित्र वस्तुनिष्ठ विश्लेषणको अभाव रहेको उल्लेख गर्दै सतही मूल्यांकनले पार्टीलाई सक्किने दिशातर्फ लैजाने चेतावनी दिए। उनले भने नेतृत्वले जे सुन्न रुचाउँछ त्यही मात्रै सुनाउने प्रवृत्तिले हामीलाई सुधार्दैन। भदौ २३ गतेको नरसंहारको जिम्मेवारीबाट सतही विश्लेषणका आधारमा एमालेले आजीवन उन्मुक्ति पाउँदैन।
उनले पार्टीमा भ्रष्टाचार र व्यभिचारका आरोपमा मुछिएका नेताहरू अझै केन्द्रीय कमिटीमै रहेको बताउँदै सो विषयमा संस्थागत कारबाहीको माग पनि गरे। सिंहका अनुसार हाल जनताको आक्रोश एमालेमाथि भन्दा पनि अध्यक्ष केपी शर्मा ओली र उनलाई घेरेर चलाउने समूहमाथि केन्द्रित छ। उनले भने वास्तविकता आत्मसात् गरेर जिम्मेवारी हस्तान्तरण गर्दै ओलीले मार्ग प्रशस्त गरे मात्रै पार्टीको भविष्य सुरक्षित हुन्छ।
त्यस्तै उनले पूर्व राष्ट्रपति विद्यादेवी भण्डारीको सदस्यता नवीकरण गरी पार्टीभित्र सक्रिय हुने वातावरण बनाउनुपर्ने सुझाव दिएका छन्। उनका अनुसार चुनाव बहिष्कार गर्ने नीति अर्को भिडन्त निम्त्याउने योजना हो। कमजोरी सच्याउँदै चुनावमा जानुको विकल्प छैन।
