बैतडीको मेलौली भगवती मन्दिरमा भक्तजनको ठुलो भीड कार्तिक पूर्णिमामा सुदूरपश्चिमकै ठूलो मेला तयारी

बैतडी — सुदूरपश्चिम प्रदेशको बैतडी जिल्लाको मेलौली नगरपालिका–देहिमा अवस्थित प्रसिद्ध धार्मिक स्थल मेलौली भगवती मन्दिरमा अहिले भक्तजनहरूको भीड लागेको छ। समुद्री सतहबाट करिब १७०० मिटर उचाइमा १३४ रोपनी क्षेत्रफलमा फैलिएको यो मन्दिर ऐतिहासिक, धार्मिक र सांस्कृतिक दृष्टिले सुदूरपश्चिमकै महत्त्वपूर्ण तीर्थस्थल मानिन्छ।

बडा दशैं, चैते नवरात्र, गौर पर्व र जनै पूर्णिमाजस्ता विशेष अवसरमा यहाँ हजारौं भक्तजन दर्शनका लागि पुग्ने गर्छन्। विशेषगरी कार्तिक शुक्ल पूर्णिमाको दिन यहाँ सुदूरपश्चिमकै सबैभन्दा ठूलो मेला लाग्ने परम्परा रहेको छ। सो अवसरमा नेपालका विभिन्न जिल्ला र भारतका विभिन्न भागबाट समेत भक्तजनहरू दर्शनका लागि आउने गर्छन्।

जनविश्वास अनुसार यो मन्दिर कत्युरवंशको पालामा स्थापना भएको हो। स्थानीय किंवदन्तीअनुसार, शिरोडा क्षेत्रमा बसोबास गर्ने कत्युरवंशी परिवारको गाई चराउने गोठालाले एक दिन जंगलमा गाईले झाडीभित्र दूध चुहाएको देखेपछि सो स्थानमा उत्खनन गर्दा एक अद्भुत शिला फेला पर्‍यो। उक्त शिलालाई पछि महाकाली नदीमा विसर्जन गरेपछि पनि चमत्कारिक रूपमा गाईले दूध दिन थालेपछि सो शिलालाई पुनः ल्याइयो।

गोठालाले यात्रा क्रममा देही भन्ने ठाउँमा शौच गर्न रोकिँदा मेल (काठको लठ्ठी) गाड्दा त्यसमा हरियो पात पलाएको र शिलाबाट ‘मलाई यहीँ राखेमा म जल सृष्टि गरिदिन्छु’ भन्ने आकाशवाणी सुनेपछि त्यहीँ मन्दिरको स्थापना गरिएको जनविश्वास छ। मेलको लठ्ठीबाट मेलौली नामकरण भएको मान्यता पनि रहेको छ।

हाल मेलौली भगवती मन्दिर सुदूरपश्चिमको आस्था, एकता र परम्पराको प्रतीक बनेको छ। मन्दिर व्यवस्थापन समितिका अनुसार भक्तजनहरूको सहज आवागमनका लागि बाटो, खानेपानी र सरसफाइ व्यवस्थामा सुधारको काम भइरहेको छ।