बैतडी — बैतडी जिल्लाको प्रसिद्ध धार्मिक तथा ऐतिहासिक तीर्थस्थल शिवनाथ धाममा यही कात्तिक ११ र १२ गते भव्य जात्रा आयोजना हुने भएको छ । शिवनाथ गाउँपालिकाको वडा नं. ६ स्थित यस धाममा हरेक वर्ष कार्तिक शुक्ल सप्तमी र अष्टमीका दिन जात्रा लाग्ने परम्परा रहिआएको छ ।
यस वर्षको जात्रामा पनि स्थानीय भक्तजनसहित सीमावर्ती भारतीय दर्शनार्थीहरू समेतको बाक्लो सहभागिता रहने अपेक्षा गरिएको छ । जात्राको विशेष आकर्षणका रूपमा छालाको भकुण्डो खेल्ने चलन यसपटक पनि निरन्तरता पाउने भएको छ ।
धार्मिक विश्वास अनुसार शिवनाथ धामको दर्शन गरे मनोकामना पूर्ण हुन्छ भन्ने जनश्रुति रहिआएको छ । त्यसैले प्रत्येक वर्ष हजारौँ श्रद्धालु भक्तजन यस धाममा पुगेर भगवान् शिवको दर्शन तथा पूजन गर्ने गर्दछन् ।
गाउँपालिका र स्थानीय समुदायको सक्रिय सहभागितामा यस वर्षको जात्रालाई अझ भव्य र व्यवस्थित बनाउने तयारी तीव्र पारिएको छ ।
