चितवनको कालिका नगरपालिका-११ सिद्धि कल्याण चौरस्थित भित्री सडकमा गए राति भएको दुर्घटनामा एक जनाको मृत्यु भएको छ। जिल्ला प्रहरी कार्यालय चितवनका सूचना अधिकारी रविन्द्र खनालका अनुसार सिद्धिबाट कल्याणचौरतर्फ गइरहेको बा १८ च ८९७३ नम्बरको बलेरो राति करिब १०:३० बजे अनियन्त्रित भई सडकदेखि करिब १५० मिटर तल खसेको थियो।
दुर्घटनामा खैरहनी नगरपालिका-४ का चालक राममणि न्यौपाने गम्भीर घाइते भएका थिए। उनलाई उपचारका लागि भरतपुर अस्पताल लगिएको भए पनि चिकित्सकले राति नै मृत घोषणा गरेका थिए।
बलेरोमा चालक न्यौपाने मात्र सवार रहेको प्रहरीले जनाएको छ।
