बिहीबार बिहान ७ बजेदेखि देशैभर प्रतिनिधिसभा सदस्य निर्वाचनअन्तर्गत मतदान जारी रहेको छ। देशका ७७ वटै जिल्लाका १ सय ६५ निर्वाचन क्षेत्रमा एकैसाथ मतदान सुरु भएको हो। मतदान केन्द्रहरूमा बिहानैदेखि मतदाताको उत्साहजनक उपस्थिति देखिएको छ भने समयसँगै चहलपहल बढ्दै गएको छ।
निर्वाचनमा ६८ राजनीतिक दलबाट प्रत्यक्षतर्फ तीन हजार ४०६ उम्मेदवार चुनावी मैदानमा उत्रिएका छन्। समानुपातिक प्रणालीतर्फ भने तीन हजार १३५ जना उम्मेदवारको बन्दसूची निर्वाचन आयोगमा बुझाइएको छ।
आयोगका अनुसार देशभर एक करोड ८९ लाख तीन हजार ६८९ जना मतदाता मतदानका लागि योग्य रहेका छन्। देशभर १० हजार ९६७ मतदानस्थल र २३ हजार ११२ मतदान केन्द्र तोकिएका छन्।
निर्वाचन गराउन पाँच लाख ५६ हजार कर्मचारी तथा सुरक्षाकर्मी फिल्डमा खटिएका छन्। यसमध्ये दुई लाख १५ हजार कर्मचारी, एक लाख ४९ हजार ९० जना निर्वाचन प्रहरी, ७९ हजार ७२७ जना नेपाली सेना, ७५ हजार ७९७ जना नेपाल प्रहरी र ३४ हजार ५७६ जना सशस्त्र प्रहरी बल परिचालन गरिएको छ।
गत भदौ २३ र २४ गते भएको प्रदर्शनपछि तत्कालीन संसद विघटन भई नयाँ प्रतिनिधिसभा निर्वाचन हुन लागेको आयोगले जनाएको छ। विशेष राजनीतिक परिस्थितिमा हुन लागेको यो निर्वाचनलाई अर्थपूर्ण रूपमा हेरिएको छ।
आयोगले मतदान समय साँझ ५ बजेसम्म तोकेको छ। मतदातालाई आफ्नो अमूल्य मत खसाली लोकतान्त्रिक अधिकार प्रयोग गर्न आग्रह गरिएको छ।
